打算 11 月利用十天時間開車環台一周，隨便走走，沒有特定景點，於是上網找資料計劃一下。對我嚟講，台灣除咗電子產品就是，老歌，再加上近年來的台灣電影：
老歌而跟旅遊有關的：
羅大佑 鹿港小鎮
鄧麗君 那些年（不是九把刀的那些年）
台灣電影而跟旅遊扯上關係的：
艋舺 故事發生在 基隆 廟口
海角七號 故事發生 墾丁 恆春
賽德克．巴萊 故事發生在霧社，不過拍攝場地在 新北市 林口 霧社街
父後七日 故事發生在 彰化 拍攝場地在 田尾公路花園
推薦大家先去找這幾套片回來看看。
首先是要決定順時針走還是逆時針走。台灣是左軚車，花蓮台東一帶是沿海岸線走的，順時針走就會走在靠山的一方，睇海景可能冇咁好，而且如果遇到風景區想停一停就要越線停車，咁就選擇逆時針走吧。
其次是決定飛台北還是飛高雄。我選台北，因為台北至高雄大概會用一半時間，高雄回台北又是另外一半，咁就可以容許冇十天假期嘅朋友中途加入或者半途離隊。
擇咗吉時，鐵定 11/11 宜出門﹑遠行，21/11 回港，共計 11 日 10 夜，睇吓各位老友記嘅假期能否配合，歡迎提出各自的建議。
第一天： 桃園 苗栗
香港飛台北嘅航班由早上八點開始就有，不過一般都集中在中午前後，估計要中午左右才能抵達台北桃園國際機場，租車最好係能夠提供在機場攞車嗰種，暫時覺得格上租車合適，大家可以去佢哋個網站選下車型。11 月初冬，日落時間比較早，而且係第一日，不適宜走太遠，打算途經南庄遊覽水美木雕街，到九鼎軒客家米食 tea 一 tea，入住福田瓦舍（後備山居蘭園民宿），在卓也小屋食晚飯（素食）。
華航 CI-602， 10 點機 11:40 到台北桃園，喱個鐘數唔使早起，又可以有巴士、地鐡，方便啲。
格上，要搭 705 公車（NT$30 蚊一位）去桃園機鐡站攞車，唔算麻煩，而且我打算早一日喺台北市還車，到時大概是搭捷運去機場，早啲認識一吓桃園機鐡站同機場的交通。
亞順強烈要求，一出車要先去桃園大江國際購物中心的家樂福買乾糧，不過，買乾糧使唔使要去大賣埸呀？希望佢唔係 mall 鬼啦！如果就咁行 mall 行幾粒鐘…
福田瓦舍，訂了，網上搞掂 PayPal 俾錢。
第二天： 彰化
去彰化縣田尾鄉公路花園嘗菊，再到鹿港老街走走，附近有台灣玻璃館。先去鹿港也可以，今天的活動都在彰化，距離不遠。黃昏入住阿信の家，到夜光高鐵餐廳食晚飯睇夜景，也可以晚上再去睇菊燈，不過揸夜車可能會迷路，要選一位有經驗的領航員，聽講雲英有多次領航經驗，唔知佢識唔識用 GPS 呢？
彰化啲民宿經營者比較少用 internet，無法上網搞，暫時接受亞潔的建議，到時才搞，於是要準備多一兩個選擇：金村.花園民宿、花宿、嘉豐民宿。根據網站資料，我較喜歡金村.花園民宿，因為他的介紹說有光纖上網，真定假呢？有光纖但係冇網上訂房！奇？
推薦讀物：【Tony 的自然人文旅記】之 鹿港古蹟之旅。
第三天： 清境
去清境途經里埔里，可以先去埔里紙產業文物館觀光，午餐可以在埔里鎮的你我他晚點的臭豆腐 + 小上海阿和小籠包，有亞潔喜歡的油豆腐粉絲湯。
霧社，是探訪原住民文化，可能比較悶，不過睇咗賽德克．巴萊想認識多點原住民的歷史，清境農場冇小朋友同遊又會冇咁興奮，據網友介紹，清境最漂亮的地方是清境農場的青青草原、觀山步道及畜牧步道，今晚住得好一點，雲濛仙境或者凌雲山都，在雲濛仙境試擺夷料理，不過從啲相片睇嚟，好似一般般，有時間就再搵搵有冇其他更有特色的。
雲濛仙境居然冇房！才 16/Oct，真定假？凌雲山都又唔覆電郵，唯有再找其他選擇。找到了這間比佛利山莊，又平又靚（亞 Q 精神），又係用 PayPal 落訂。
要不要去奧萬大森林賞楓呢？自己由楓葉國嚟，冇理由仲要去其他地方賞楓呀？
推薦讀物：【Tony 的自然人文旅記】之 霧社事件的省思－從電影《賽德克．巴萊》談起（上／下）
第四天： 台南 嘉義
今日行車時間會比較長，是先下山然後再上山，大概要四個半小時。中途可以在嘉義市（車程三個小時）或者上山後的雲瀑谷咖啡（車程四個小時）休息一下。
我選了嘉義市的 48Home 吃 brunch，然後去附近的豆漿豆花店買十穀米漿或者去御香屋買葡萄柚綠茶路上飲用。
奮起湖老街＋阿里山好似幾多嘢睇，如果想睇阿里山日出，可以取消清境，兩日都在這裡，可以慢慢玩。 住淵明居山庄，嘆高山茶，觀雲海，睇夕陽。還有網上介紹的阿里山的日出、雲海、晚霞、森林與高山鐵路，合稱為阿里山五奇（俾佢講哂）。住喺民宿有啲唔方便，就係 check-in 多數要下午三時之後，唔可以早啲去放低啲行李同埋部車，再坐小火車上阿里山玩。
淵明居山庄雖然是經中間人（長龍科技股份有限公司）不過可以用 PayPal 落訂，管他，成交。如果其他民宿都用這些中間人，咁就大大方便了如我哋這類遠方訪客。
第五天： 高雄
先去佛光山參觀，同時探望老朋友亞高，黃昏要去看看著明的六合夜市，左營的蓮池潭滿天神佛，就不敢恭維了，記得要去食劉家酸菜白肉鍋。可以住在佛光山的，暫時選了入住美濃中正湖民宿（哩間好似更好：美濃情休閒軒），因為早上起來可以探訪美濃民俗村。
還有，高雄地下鐵美麗島站被選為最美的地鐵站之一，也要抽時間去睇睇。再加一個景點，法蘭斯手工鞋。
呀，還有，24 小時洗衣店，打算在這洗衣，據說：洗衣小桶 四十元、烘衣五分鐘 十元、有販賣洗衣粉，仙度拉自助投幣洗衣店、泡泡龍投幣式洗衣店、太多選擇了，不能盡錄，一定要試試。
亞順強力推薦高雄 85 大樓民宿，當然冇問題啦，難得試吓一啲唔係民宿嘅民宿，增長見識嘛，而且喺市區落腳，去洗衫、去地鐡站、去六合夜市、法蘭斯手工鞋這些景點比較容易。俾駕駛員休息一日都係好事吖！
85 大樓的資料好混亂，亞順提供的網頁好似釣魚網站咁，這個好似才是官網，希望到時有房攞啦！
第六天： 屏東 墾丁
住在簡單‧生活，景點有： 恆春古城﹑墾丁國家公園﹑貓鼻頭﹑船帆石﹑鵝鑾鼻燈塔，玩我就興趣不大，海角七號 feel 對我來講又有啲過時，要睇睇恆春古城，其他揸車就冇所謂啦，不過就一定要專程去食吳師傅魯味，睇吓係咪咁好食。
可能我不夠積極吧，亞順報料，要食小杜包子，晚上要去睇出火景觀，仲要住喺墾丁伯利恆民宿。食＋玩，無問題吖，可以照跟，不過住就唔夠理想，太近鬧市了，我都係喜歡坐喺簡單生活飲吓酒睇吓星星，最好有日出日落睇啦，海平面嘅日落，應該係好難得嘅風景嚟。
搵咗卡米克特色民宿，六人房，獨棟，有陽台，陽台有泡湯池，池邊有戶外餐桌，早餐係有機食物！
第七天： 台東 花蓮
墾丁至台東一段路好似冇咩嘢睇，主要係沿途嘅海岸景色，一路可以停停走走，lunch 在富岡漁港的美娥海產店食魚生，飯後可步行至 小野柳 看看，下半程的路上可以順道探訪 阿美族民俗中心，希望唔好錯過路邊嘅晨霄海鮮，見識吓奇怪嘅老闆做嘅海鮮餐都好吖。
這段車程比較長，晚上希望住在花蓮的歸園田居，有興趣可以去附近的紅葉溫泉或者瑞穗溫泉浸溫泉，女士們，記得帶泳衣囉！
歸園田居，要了一間四人房，加床，老闆說空間足夠大，應該冇問題的，而且老闆好大方，不用先付訂金，直接給我們留房。
第八天： 花蓮 太魯閣
噙日坐咗太耐車，今早可以遲啲起身，如果唔瞓得嘅朋友可以參觀園內的葡萄隧道。今日午餐比較早，大概 11 點，要去【花蓮鳳林】月廬食碳烤梅子桶雞，月廬本身已經好值得一看。記得提早一日定位。
花蓮漁港唔係好多嘢睇，我哋已經試咗海鮮餐，可以 skip 花蓮漁港，但係太魯閣就唔知夠唔夠時間遊覽？應該先遊太魯閣再睇剩番幾多時間再作安排，可能行程會趕一點，否則下一站嘅九份就會搞到好夜。遊太魯閣有網友建議可以咁玩：
太魯閣一日遊:清水斷崖→砂卡噹步道→太魯閣國家公園服務中心→午餐→長春祠→布洛灣遊憩區→燕子口步道
半日遊行程一:清水斷崖→太魯閣國家公園服務中心→砂卡噹步道
半日遊行程二:長春祠→布洛灣遊憩區→燕子口步道→九曲洞步道
嘆完隻梅子桶雞都已經去咗半日，太魯閣暫定半日遊啦，如果唔夠喉明天再補半日，晚上入住七星潭渡假飯店。
這個七星潭渡假飯店好似好受歡迎，很多房間已經訂購一空，找到了一間豪華兩人房一間 VIP 四人房，而且要即時全數支付，到時係爛地一片就大鑊。
第九天： 宜蘭 台北
首先要一早起來做吓晨操，單車遊，飯店所在的海岸線是美景來哦，不要錯過了。
宜蘭居然有個咁好的旅遊點：金車宜蘭威士忌酒廠，先記下，再安排，看看有否時間去參觀一下。
入住九份的 Villa 115，最理想就係去埋基隆 廟口 食晚餐，不過去唔倒都無所謂，因為台灣啲夜市大概差不多，都係以小食為主，近近哋九份嘅阿妹茶樓都唔錯。
Villa 115 冇 online 落訂，唯有搵第二間，訂咗九份望琴海民宿，PayPal 俾錢中間人，不過又係一次俾哂，唔知會唔會出事？
霜淇淋岩，先記一筆，睇吓有冇機會去。
第十天： 台北
Dongusti 士林住宿，台北一日遊自由行行程推薦，我就想去誠品書店信義旗艦店﹑士林夜市﹑淡水老街/咖啡館/日落，食番餐黃河蜀魚館嘅活魚。台北啲景點大多可以搭捷運去，部車好似重麻煩咗，使唔使早一日還車呢？一於早一日還車。
又跳槽，台北中山會館，都算幾奇怪的房東，是由香港這邊負責運作的，大家可以睇清楚他們網上的資料，我追查過，網上討論區有人住過我才放心訂的，希望唔會給各位帶來 surprise 啦。
第十一天： 台北 桃園
剩番半天，可以做啲咩？如果係晚機，可以去新北市 林口 霧社街睇吓賽德克．巴萊個片場，好似話係用咗八千萬蓋搭的，不過，冇車，攞住咁多行李掂去？早一日還車哪，衰咗。
團員：
正駕駛員 志雄
副駕駛員 亞潔
領航員 雲英
團員 婉微 貓女 亞順
溫馨提示：
有駕照而又有興趣駕駛的朋友請準備國際駕駛執照
接受報名中！
天氣：根據台灣中央氣象局嘅資料，11 月天氣應該好溫暖，由北至南計係 20~25 C，山區再低一點，冇咩雨。
電話卡：中華電信／台灣大哥大／遠傳電信，都差不多，我選台灣大哥大，我要有 10 日上網再加打吓本地電話就足夠，估計要買這個 NT$945 + 100 的東西，扣除 10 日上網費 NT$600，還剩 445 可以打電話，唔…冇咩問題吧？最好有人帶個有 WiFi Tethering 功能嘅手機，咁就人人都可以上網 WhatsApp。
電插頭：呢道有哂，有圖有字，台灣用 A / B 型，香港啲插頭唔可以用，記得去買隻 adapter！